Apocalipse do porco

Meu fillo, algún día todo isto será teu

Ou podería ser teu xa

O Goberno municipal cumpliu a súa promesa electoral de suprimir o carril bus. Os comerciantes queixáranse de que o carril bus afectara ós seus negocios negativamente. Non tivo nada que ver a crise económica nin a apertura de moreas de centros comerciais na cidade, a culpa de que os comercios esmorezan é do carril bus. Claro.
Aquí deixo algunhas opinións miñas sobre o tema.

Primeiro, o positivo, van tentar cousas algunha cousa nova para suplir o carril bus: Limitar o tempo de estacionamento, regular os semáforos en función dos buses e converter as rúas da «Red e» nun micro-Estado policial vixiando todo con cámaras.
O tempo dirá se acertaron ou non. Se acertan terei que rectificar, porque eu penso que o alcalde comete un erro ó eliminar o carril bus.

Aparcamento. O primeiro erro é filosófico. O carril bus eliminou aparcamento en superficie, e o aparcamento en superficie elimina o carril bus. Chamádeo como queirades, mais antes había espazo para os coches particulares por unha banda e para o bus por outra e agora hai espazo para coches particulares e buses por unha banda e para os coches particulares (detidos) por outra. Gáñanse 240 prazas de aparcamento en superficie.
Eu pensaba que o moderno era apostar polo transporte colectivo, por favorecer o bus, que elimina contaminación e tránsito das cidades. O populismo do alcalde aposta polo cosmopailanismo dos que prefiren ir en coche até a porta da tenda, ou dar voltas buscando onde aparcar. Todo por non coller o bus, ou coma mal menor por non pagar por meter o coche nun dos aparcadoiros que xa existen na cidade. Así fomentamos o transporte público.
E non sei por que, mais desconfío da utilidade desas prazas de 20 minutos. E mais ainda para reactivar o comercio. Isto é unha intuición baseada no funcionamento actual da ORA, veremos co tempo, coma todo.

Semáforos regulados para dar prioridade ós autobuses. Aquí igual esvaro porque os meus coñecementos sobre o tema son limitados, mais teñen que explicarme mellor como van acadar dar prioridade ós buses se van pola mesma vía que o resto de veículos. As vias polas que van os buses van ter unha prioridade indefinida? Como vai afectar a prioridade variable das rúas polas que pasan os buses ás rúas da contorna?

Cámaras. É certo que hai que renunciar a certa privacidade para ter mais seguridade nas rúas, mais queremos que nos controlen 24h para mellorar o tránsito? Cal vai ser o seguinte necesidade que supoña aumentar a vixiancia? Sei que este é o argumento mais feble da miña oposición á eliminación do carril bus, e non dubido que este incremento na videovixiancia é benintencionado. Con todo paréceme un precedente (mais) a evitar.

A propaganda.

Este video que vin hoxe (no bus) é o motivo de que agora estea escribindo isto.

Chamarlle manipulador é pouco, eu case prefiro dicir tendencioso. Primeiro amosamos ruas cheas de atomóbiles particulares conxestionadas ó lado de carrís bus baleiros, e buses en primeiro plano que non se aprecian moi ben.
Despois apela á convivencia entre coches e buses, eu empregando a mesma demagoxia diría que é como apelar á convivencia entre o marisco e os furtivos. Non haberá un que mereza mais protección? porque se non houbera que coidar os buses por que estás gastando tantos cartos? porque supoño que non viñeron de balde no bote de cola-cao as cámaras, as grúas, a reprogramación dos semáforos e o tempo dos axentes de policía.

Din que grazas á eliminación das barreiras físicas recuperamos 240 prazas para coches. Isto é o mellor do video. O carril bus son as barreiras físicas. Porque barreira é un termo percibido negativamente na planificación dunha cidade, eis as barreiras arquitectónicas. Non ten importancia que en realidade debera dicir Carril bus onde di barreiras, e que ademais debería facernos reflexionar sobre a causa das barreiras: impedir que eses coches pilotados por cidadáns modélicos pararan no carril bus ocupándoo e facéndoo inútil para a súa función. Ou como diría o que montou esta historia: ineficiente.

Fala de empregar as novas tecnoloxías en favor da mobilidade dos cidadáns, porque os que van no bus, que son mais que os 240 que aparcan onde estaba o carril bus non son cidadáns tamén. Desde que non hai carril bus o bus tarda mais en chegar ó meu choio pola mañá e vai cheo. Téñoo claro porque voi co tempo moi medido, o retraso cando volto á casa non o teño tan controlado e a percepción de que tarda mais igual está influida polos meus preconceitos.

O que mais me amolou de todo foi que gastaran os cartos nesta campaña de propaganda (que non publicidade institucional) para xustificar unha medida e chamarnos parvos a todos, nomeadamente ós que vamos no bus, mais tamén o resto que pensan que van sacar algo da desaparición do carril bus.
Xa non digo nada de que atopara o video só en castelán, eles saberán en que pais viven.

Despois da morte de Fraga atopeime…
Vale, non foi a morte de Fraga. En realidad
e foi a desaparición do carril bus, substituido pola ora e os carrís prioritarios(?)
Pensaba eu que as decisións da maioría, se a maioría tivera toda (toda e real) a información sería perfecto. Ou mellor ainda: O goberno dun ser omniscente, desinteresado e que buscara sempre o ben da maioría. Ese sería o goberno perfecto.
Non falo do despotismo ilustrado, porque eses despotas non podían ser totalmente desinteresados e carecían de moita información.
Ocorréuseme que isto xa o vira, isto era o que ocorría na saga da Fundación cando finalmente Asimov a uníu co Imperio e os robots. Mais non, por moito que Daneel pretenda actuar informado (e sabe moito) non pode saber todo.
O autentico gobernante tiña que ser Deus: unha teocracia.
Volta ás orixes. Ou non?
En realidade, o que os humanos vivimos foro aristocracias ou autocracias lexitimadas relixiosamente, mais Deus ipse nunca gobernou pola súa man.
Poderedes dicir que o goberno de Deus é unha fantasía, porque Deus non existe.
Eu resposto que é unha fantasía evidente, mais non é outra fantasía a nosa democracía se non temos a información que precisamos para decidir?

Pois iso: Deus, a ver se reimplantan o carril bus.

P.D. Este é o primeiro post que escribo desde o móbil. No bus.

Non pensaba eu que houbera moita necesidade dun titorial coma este, mais despois de que dúas ou tres persoas diferentes preguntaran como conectei o Mac á TV decidinme. Non a facer un screencast coma pedía Pablo, mais acho que a cousa non pide tanto e abonda con isto.

O meu iMac merqueino no 2010 mais consultando a versión agora sei que é o modelo de finais do 2009, concretamente iMac11,1. Nesta páxina de apple tedes a lista de versións do iMac e o xeito de atopar cal é a do voso equipo.

Todo isto de atopar o detalle ten o seu interese porque dependendo da antigüidade do equipo o mini displayport leva só imaxe ou tamén imaxe e son.

O meu é dos que levan todo xunto, se o teu é mais antigo hai adaptadores que xuntan a saida do mini displayport coa do son. Bota unha ollada aquí.

Unha vez claro isto pasei a mercar os aparellos:
un adaptador mini displayport macho a HDMI femia
Un HDMI macho-macho

Mercados no voso fabricante chinés de confianza, unha vez os tedes na casa, ben porque chegou o mensaxeiro da tenda online ou ben porque apoiastes o comercio local baixando a unha tenda, é o momento de ver para o aparello.

Enchufamos o adaptador no mac. Partindo da base que non tedes puta idea poño unha foto na que está todo marcado. Saqueina de google, nin gaña tiña de coller a cámara, xa vedes.

Despois unimos o adaptador co HDMI, e se tedes unha tv coma a miña atoparedes que detrás hai algo tal que isto

Sexa esta, sexa outra, as teles adoitan traer HDMI a esgalla así que non debiades ter moito problema en atopar un libre e se non, desenchufade outro aparello e listo. Se non ten HDMI trabucácheste de titorial, amigo.

Unha vez tedes todo conectado. Ide ás preferencias do sistema. Están no menú da mazá, se non buscade esta icona no dock ou entre as aplicacións.

Este é o panel aberto.

Seleccionades o son, que por se non sabedes ler, é esta icona:

Este sería o seguinte menú.

Se tedes a TV acendida o Mac debería recoñecela, entón cambiaredes a saida para os efectos de son. 

E no menu de saida escolledes o HDMI.

No meu caso despois de todo isto non escoitaba o son. Escoitei que houbo un bug nunha versión de OS X que daba problemas cos adaptadores, e no proceso de lembrar a familia de todo canto colaborou en levar os cables que mercara á miña casa lembrei algo…

Reiniciei o equipo e listo, todo funcionando. Agora lamento non mercar unha tv mais grande no seu día.

Remato deixándovos co santo patrón de todas estas leas.

Que desfrutedes.

Agradecer a Dani por facerme lembrar que non ten sentido mercar aparellos e artellar unha rede na casa cando cun par de cables podes obter o mesmo (ou mellor) resultado.

Pasouseme a data. A primeiros de decembro cumplíronse 6 anos da primeira anotación nun blogue chamado apocalipse do porco.
Nesta altura non sei se hai que dicir: «de seguir vivo, o finado chegaría os seis anos», ou: «encamado, arrodeado dos seus seres queridos, o doente cumplíu seis anos».
En calquera caso, para mín estes foron/son bos anos. Grazas por vir de visita.

Acho que algo coma ISTO era o que eu e moitos outros coma min agardaban. A ver se non estou errado.