Apocalipse do porco

Non me preocupo moito para que os visitantes de Apocalipse do Porco poidan ver o blogue igual que o vexo eu, o tamaño do molde non é mais grande porque non fun quen de agrandalo cando pelexei co CSS, e non por preocuparme polos que teñen unha resolución de pantalla pequena (un 11,6% dos meus visitantes teñen unha resolución de 800×600). Ademais, se estivera optimizado, sería para firefox (empregado por min e polo 41,8% de visitantes) e non para explorer (empregado polo 54,7%).

Con todo, hai unha cousa que si teño por costume, non poñer impedimentos artificias a que me lean noutros formatos distintos se o prefiren. Nomeadamente para os que seguen o que escribo polo RSS.

Esta xente non aparece no contador de visitas, porén son a xente que mais debería coidar (se a alguén coidara) porque estando suscritos (suponse que) len todo o que aquí escribo.

Por iso non son partidario de cortar o texto do RSS con estes ‘ler mais’ que ligan á entrada. Supoño que o farán para que o que queira ver o texto enteiro conte coma visita.

Non me amola tanto como para eliminar estes blogues do Bloglines só por iso, pero non son partidario, ainda que cada un, na súa casa goberna como quere (ou como lle deixan)

Outra cousa que me amola, esta moito mais, é a publicidade que teñen algúns blogues. Non todos, abofé, non me opoño á publicidade nos blogues, ainda que eu non a teña (e podería cambiar de opinión no futuro, non quero ser microsiervo das miñas verbas nun futuro hipotético). Refírome a esas publicidades que fan aparecer un pop up. ¿Non haberá outro xeito de chamar a nosa atención? Xa non digo nada se ademais os pop ups teñen unha musiquiña.

A captura de pantalla que puxen débese a que me resultou curioso ver unha captura que puxo o outro día torredebabel. Así vexo eu apocalipse do porco desde dentro.

Tiña anotado hai xa unha semana para comentar algo onte, co gallo do aninovo chinés, mais esqueceume. Ainda así non hai moito problema, que quedan 364 días para disfrutar do ano do porco.

Parabéns a porcos e porcas, este é o voso ano. Ainda que para moitos rematará cando chegue o mes de santos.

Agora mesmo deixanme este comentario aquí

Ten o mal detalle o que o deixa de non poñer o seu enderezo de correo, porque o que me deixa penso que non é o seu.

Esto é o único que me molesta do seu comentario, porque o resto débese a que non me expliquei eu ben, ou que non leu ben o que puxen.

¿quen insultou a ninguén no meu texto?
¿quen critica a película, cando o único que digo é que non a entendín e falo de esceas que me fixeron sorrir?
¿nunca oiras falar da expresión gafapasta?
¿quen falou nada da xente que entende a película e gosta dela?
¿Tes problemas con algunha rapaza que leve xersei de raias e tenis converse, vai de nacionalista e fala mal o galego? Eu non falei para nada dela.

Explicoche aquí, xa que non podo mandarche un correo, que a reseña (non crítica, que eu non entendo de cine) da película Tropical Malady pretende estar escrita con humor. Algunha das cousas que alí se din son bromas feitas con xente que gusta moito da película.

Se non me gustou a película sería parvo se dixera que me gustou. E o mesmo se non entendín o que conta o director na segunda parte da película. ¿que opción teño? ¿non dicir nada? ¿disimular e facer como que son fan? Non, ho.

Vou repetir unha parte do texto: «Se pedides o meu consello, ide ver Tropical Malady» para que a xente saque as súas propias conclusións, igual que eu saquei as miñas. Tamén digo que non leven ós seus fillos para aforrar cartos no siquiatra, pero iso está posto como unha coña, e quen queria que o entenda.

Se non concordas para iso están os comentarios, pero eu non insultei a ninguén, chamar a alguén friki ou gafapasta non considero que sexa un insulto. Se fora así non tería mercado gafas de pasta hai quince días.

Non tería problema en que Apichatpong Weerasethakul vira o meu comentario á súa película ¿e vaiche molestar a ti?

Por certo, saín contento de ir ver a película. Moito mais que de outras, pero iso non cambia nada do que dixen, non foi unha película que me gustara. Xa vexo que a ti si. Parabéns.

Non coñezo persoalmente a Super Piñeiro, e ainda non vin o seu novo programa, pero podo opinar sobre el despois de moitos anos na Galega como conductor de Supermartes.

En realidade a cuestión non me parece que sexa a valía profesional de Xosé Manuel Piñeiro. Ese non é o tema.

Eu, que non son fan de Piñeiro recoñezo que ten grandes cualidades como comunicador. Non era o meu estilo de programa nin de lonxe, pero Piñeiro ten o seu público. Si, ese público que lle deron neste novo programa, os vellos. O único público que cultivou a TVG nos anos que durou a etapa de Fraga. Non sei se dando por perdido o voto urbano e xuvenil, ou por gusto e afinidade persoal do que mandaba, a TVG descoidou o público que había de darlle o relevo á xente que xa falaba galego.

Seguro que na TV3 non teñen problemas en que a xente nova vexa a súa programación. A súa grella sempre contou con programas atraintes para ese público. E non é que a TVG nunca os tivera, lembro, en tempos ‘A tumba aberta’, por dicir só un que estivera adicado ós novos, ou o Chambo mais tarde.

A xente que xa non seguía o Xabarín, cos seus debuxos animados, esquecía para que podía valer unha TVG que non tiña nada que ofrecer. Agás futbol para o que lle guste, que non é o meu caso.

Nesta situación chega o cambio político na Xunta, con tan mala sorte que hai tamén algúns cambios nas canles en aberto. Aparece Cuatro. Paraece unha parvada, pero non o é. E isto sábeno moi ben os que lle puxeron o nome a ‘nova’ canle: Moita xente reordeou as canles no seu televisor.  Se alguén fai zapping dun xeito ordeado empezará polo 1, despois o 2, o 3, etc e así, ten menos posibilidades de chegar á TVG que antes. Sobre todo tendo en conta que unha parte importante da audiencia non está habituada a atopar cousas que lle poidan interesar na TVG, os mais novos.

A pesar de que hai algúns cambios na programación da TVG, con novos programas que tentan chegar a un público mais amplo, con maior ou menor acerto: Somos unha potenzia, Cifras e Letras, a casa de 1906, libro aberto, volver ao rego, hai debate… Apesar diso, a xente só percibe que segue o Luar, e que quitaron o Supermartes. Porque non ven a TVG.

Mal poden saber que cambio a TVG se non a ven, se non lle dan unha oportunidade. Por iso, agora que volta Super Piñeiro, parece que todo volta ó comezo, ainda que non sexa todo igual, mutatis mutandis a percepción é a mesma que tiñan con Fraga, porque non ven a TVG, só saben que seguen Piñeiro e Gayoso.

Por outra banda, a felicitación de Vicepresidencia á TVG pola volta de Piñeiro é de coña. ¿Que querían, que parecera que todo é un compadreo? ¿que ten relación ca xira de Quin e SuperPiñeiro xuntos? ¿que voltou por ser alaricano? ¿Acaso non había xa programas na TVG para que viran os vellos?

Paréceme ben que volte Piñeiro, se fai un programa decente e non iso que facía, que xa lle podía dar vergoña a Reixa ter relación co Supermartes, porque Piñeiro non foi o creador penso eu, e a Reixa ninguén llo bota á cara.

Todos temos pasado, só que algúns mais visibel que outros, se o programa é interesante non me parece mal que poñan a Piñeiro, e se o programa é malo paréceme mal que poñan a calquera. Unha hora diaria non vai marcar a diferenza de estilo da canle. Para o que vexa a canle, claro, para o que o lea nos xornais, pois igual si.

Por certo, Super Piñeiro, non me cae ben como persoaxe.

A xente de Vieiros decidiu darlle unha volta á súa imaxe. É certo que, como algún comentou, vai na liña de outros xornais dixitais, que tamén lavaron a cara non hai moito.

Comparando Vieiros con elmundo.es, lider dos xornais dixitais en castelán) vemos que o estilo é moito mais limpo, moito mais semellante a elpais.com, que supoño eu que sería fonte de inspiración dos deseñadores.

O novo Vieiros manten moitos dos seus elementos de identidade e engade novos elementos que haberá que ver o que dan de si, como poden ser os videos, ainda non acesibeis na beta. Unha das cousas que destacaría (polo que me toca) é a nova ubicación do espazo adicado ó Blogomillo na súa páxina, moito mais destacado que na súa situación anterior. Ademais, entre os tres exemplos estáticos que puxeron, ademais de brétemas e dpaso puxeron unha entrada deste blogue. Supoño que se deberá a algúns dos coñecidos que teño nas tripas de vieiros, pero non por iso deixa de ser agradable.

Outro tema, de moita mais importancia é o da publicidade. Sen moito traballo suprimin desta captura o 75% da publicidade que había na páxina. Moito mais difícil sería en elmundo ou elpais, pero incluso en lavozdegalicia.es o nível de publicidade é superior. Este detalle fala de audiencias, é un indicador moito mellor que calquera contador de visitas que poidamos poñer. E non vou falar do tipo de publicidade que hai nun e noutro sitio, que daría para falar moito.

Xa son moitos anos con Vieiros como páxina de inicio do meu navegador, ainda que agora comparta espazo con outras, nomeadamente co Chuza. E seguira moito mais se seguen facendo as cousas ben.

Engadido: Calidonia fai unha análise mais polo miudo e fai unha proposta alternativa tomando como base o novo deseño.

Por se algún está despistado, xa lle aviso que non vou falar de que Cuiña pedira comisións para adxudicar obras. Non vou suxerir tal cousa, nin se me ocorre cousa mais lonxe da realidade.

Do que quería falar é do interese do parlamentario señor Cuiña Crespo, ex-conselleiro de ordeación do territorio e obras públicas, que quere estar nunha comisión que vai investigar o que pasou nas obras da via rapida do Salnés.

Estas obras que se van investigar, e que lembraredes que se investigan porque a estrada non quedou todo o ben que debera e agora hai que facer outra nova enteira, fixeronse cando o señor Cuiña ainda era conselleiro.

Un dos posibles resultados sería que a comisión decidira que o señor Cuiña (como máximo responsable político da consellería que construíu a estrada) é responsable político da mala construcción da estrada. Non sei o que decidirán, que non teño unha bola para ver o futuro, pero entra dentro das posibilidades. E o señor Cuiña será un dos que voten para decidilo.
O señor Cuiña, aquí será dun xeito case literal, xuiz e parte nos feitos.

Alega o señor Cuiña, para querer estar na comisión, que quere oir e ver ‘en directo’ as declaracións dos que foron os seus subordinados directa ou indirectamente nesta obra. O resto de partidos din que o señor Cuiña podería influir nas declaracións dos que falen na comisión ca súa presenza.

Señor Cuiña, debería absterse de participar na comisión por hixiene política, porque aquí o que conta non é o seu interese particular en satisfacer a curiosidade, aquí o que conta é o interese de Galicia, Nai e Señora.