A miña relación con esta obra foi moi revirada. Tentei por dúas veces ler esta banda debuxada sen que lle atopara moito interese. Porén a boa consideración na que teño o gusto da xente que dicía que era xenial fixo que tentara darlle unha terceira volta.

Non diría que me gusta se non fora tal, simplemente calaría. Pero o caso é que gustoume moito.

Como dixo a revista Time: tan dramático coma o Señor dos Aneis pero moito mais divertido. Maxia, dragóns, princesas, …monstrorratas. Jeff Smith di que a idea básica da obra sería Bugs Bunny dando un húnido bico na boca a Aragorn.

Penso que o que me botou para atrás as veces anteriores foi que non chegara ó comezo da trama de aventuras que ten a obra e quedara só na parte divertida. Lin as mil trescentas e pico páxinas en tres días, primeiro na reedición coloreada que está a editar Astiberri, cando rematei o xa editado seguín coa edición de Dude de hai uns anos no branco e negro orixinal. Esta edición non chegou a completarse, polo que seguín ca edición nun tomo en inglés até chegar ó final.

Fixo que sospeitara que a obra estaba ben o feito de que Turuto tivera todo este material duplicando e mesmo triplicando por partes.

Se queredes saber mais sobre esta obra deixo a ligazón á wikipedia (pero está chea de spoilers, quedades avisados.)

A edición a cor non é superior á orixinal en negro e branco pero ten un resultado moi bo, as cores están moi ben escollidas e non estragan o resultado, o colorista comenta algo do proceso no seu blogue. Podedes baixar aquí o primeiro capítulo completo da web de Astiberri.

Se pensades darlle unha oportunidade aproveitade agora, que Jef Smith vai estar na Coruña en agosto. Avisados quedades.

Na foto Jeff Smith debuxando a derradeira páxina de Bone o 10 de maio do 2004.

Para o que lle interese o tema, na páxina oficial de bone contan tamén algo da historia da obra e de como comezou como unha autoedición por Jeff Smith e foi espallandose grazas ós comentarios na rede.

Chuzame! A Facebook A Twitter