É curioso que sendo botella e garrafa dous sinónimos, engadindo o prefixo ‘-on’ convírtanse en (mais que antónimos) sustitutos.
O problema do botellón é única e exclusivamente un problema de orde público e de convivencia. É evidente que a xente que vive onde teñen lugar os botellóns (ou nas zonas de marcha tradicionais por non esquecer o evidente) teñen dereito ó descanso. O do dereito a divertirse ten a súa coña porque lembra o dereito ese que recolle a constitución dos EUA da percura da felicidade.
Non penso que exista o dereito a divertirse coma tal dereito, porén é evidente que todo o mundo ten dereito a reunirse, porque o dereito de reunión si está recoñecido e mesmo poderían manifestarse ainda que para iso teráin que pedir unha autorización administrativa. Os que tamén están protexidos pola lei son os veciños, porque dubido que o botellón non sobrepase o límite de ruido permitido.
A droga da nosa cultura (porque cada cultura adoita ter unha droga) é o alcohol. Antes a aprendizaxe do seu consumo realizábase na casa e progresivamente introducíase ós rapaces no seu consumo. Agora, coñecendo os perxuizos do seu consumo polos nenos, xa non se permite o seu consumo na nenez e perdeuse a aprendizaxe anterior.
Ademais mudou radicalmente o xeito no que se consume o alcohol. Mentras antes era o mais frecuente o consumo de viños e de licores en moita menor medida acompañando e prolongando ás ceas e comidas, agora consumense licores de alta graduación combinados e en grandes cantidades ainda que tamén moita cervexa e viño transformado en calimocho. Bébese moito e moi rápido co fin de estar bébedo e non ós poucos nun tempo mais prolongado chegando á embriaguez dun xeito mais progresivo.
É a solución prohibir o botellón? Para os veciños si, ou alomenos que lle leven os rapaces lonxe da súa casa. Porque si non houbera rebumbio ás noites ninguén estaría protestando.
Porén a solución non é esa. E tampouco dar ocio alternativo, ainda que estaría ben que os mais novos tiveran alternativas para reunirse sen a presencia pemanente e necesaria do alcohol e así poder divertirse e ligar.
Se cadra a cultura do viño que había nas tabernas e ir tomando pinchos e viños (ou cervexas) coma os nosos maiores sería o camiño de convivencia mais axeitado entre o ocio de uns e o descanso de outros. Cantar na taberna molesta ós veciños pero berra na rua ainda mais.
Evidentemente isto non é cousa de un día, e mentras os empresarios dos bares de copas deberían facer exame de conciencia e decidir, polo ben do seu negocio se non sería mellor baixar o prezo e esquecer o garrafón para ser a alternativa lóxica ó alcohol na rua. Ademais ese si que é un problema de saude pública, porque o alcohol que serven algúns non sei se pasaría os controis sanitarios.
Para rematar. Ainda que o botellón existe en toda Galicia, onde mais problemas semella que cria é na Coruña. É casualidade que na Coruña os pubs teñan a decoración mais cutre normalmente que os de Vigo? Para ir a un sitio cutre a escoitar unha musica sen xeito e pagar un pastizal por beber garrafón, bebo na rua a calidade que eu queira pagarme a un prezo sensiblemente menor e, se é preciso, canto eu (nótase que non vivo nunha zona de copas).
Por certo, son eu só o que de pequeno cando falaba de garrafón pensaba en algo coma isto?
