Apocalipse do porco

Teño o inmenso pracer de aloxar o meu blogue na Blogaliza case desde o comezo da súa andaina, foi un proxecto que sempre me pareceu interesante e polo que sempre apostei.

O que empezou coma un proxecto persoal apoiado nunha comunidade está cambiando desde hai algun tempo de forma buscando dar aos usuarios e visitantes cousas que na súa forma actual era complicado ofrecer. Agora a xente de algueirada ocuparáse de dar forma, soporte e tamén engadir ainda mais contido á Blogaliza.

Desde o pequeno coñecemento que a amizade cos seus administradores foi revelándome ós poucos, cada día estaba mais ilusionado polas novidades que se achegaban e disque o día 1º de maio será a data oficial de presentación da Blogaliza 2.0. Namentres abren un espazo para as propostas na capa da Blogaliza. Mellor que deixe que sexan eles mesmos os que o expliquen:

A comunidade Blogaliza acolle a máis de 1700 blogues en galego (sobre temas
literarios, educativos, blibiotecarios, deportivos, persoais, etc.) e máis
de 6000 usuarios/as rexistrados/as. A portada de Blogaliza amosaba até
agora o último publicado no blogomillo, todos os blogues escritos en galego, na
propia blogaliza ou noutros sistemas, máis o directorio deste crecente blogomillo.

NOVOS SERVIZOS DA BLOGALIZA

O próximo 1 de maio abriremos a nova Blogaliza, unha versión ampliada do
habitual servizo de blogues en galego que integrará tamén noticias
culturais actualizadas a diario, rede social, convocatorias de animación á
creación artística e moitos outros contidos.

A partir dunha nova portada xeral da comunidade, poderase consultar
a actualidade do blogomillo, con especial intensidade no ámbito da cultura
através de seccións especializadas en literatura, música, cinema, artes visuais,
etc. A apertura destas seccións será progresiva, comezando pola de letras.

PARTICIPACIÓN NA CONFIGURACIÓN

Desde a Blogaliza temos claras expectativas do que non debe faltar, mais
queremos facer un convite público a todas as persoas, colectivos e
institucións que queiran facer propostas para enriquecela.

Desde hoxe e até o 1 de maio na portada de Blogaliza accederase a un blogue
aberto ás propostas de todos. Calquera pode mandar ideas e debatelas para que
sexan integradas na nova blogaliza. Para iso só é preciso enviar un correo a
propostas@blogaliza.org, que será publicado como nova anotación, cos comentarios
abertos para, entre todos/as, ir perfilando as novas ideas.

DIFUSIÓN DO PROXECTO

Agradeceremos toda a difusión posíbel deste correo, coa pretensión de
facermos da Blogaliza un aberto centro cultural na rede. Un espazo sen
cancelas onde poder comunicar, debater, partillar e fornecer en liberdade e
respecto a cultura que queremos.

PUBLICIDADE

Na Blogaliza temos o compromiso de que os blogues continúen a ser de balde e
sen publicidade, como até agora, salvo nas portadas temáticas, espazos onde
posibilitaremos referencias publicitarias coa intención de financiar o proxecto
e asegurar a súa viabilidade.

Son bastante receloso de que certas cousas acaben en malas mans, porén coñecendo a seriedade, integridade e a traxectoria da xente detrás de algueirada non teño medo ningún sobre o futuro da Blogaliza pola súa banda.

Alédome moitísimo por eles e por min mesmo coma membro da comunidade.

Só queda desexarlles sorte na nova andaina.

A por todas, rapaces!  

Veño de rematar a serie de BD  ‘Y: o derradeiro home’. 60 números seguindo as peripecias de Yorick Brown da man de Brian K. Vaughan e (case sempre) de Pia Guerra

Se Marco tiña ao seu mono Amedio, Yorick ten a ampersand e non vai na percura da súa nai, senon dunha rapaza

A serie, de 60 números, está concebida para ser lida mensualmente e o momentos de intriga ao fin de cada número, os cliffhanger, son moi habituais. Eu tiven a precaución de agardar a que a serie estivera rematada para lela toda seguida. Despois de ler uns cantos números hai xa mais dun ano (pode que dous) tiven a sensación de que pagaba a pena mercala enteira. Agardaba non sentirme defraudado, e acertei.

Gustoume mais do que me está a gustar Ex Machina, outra serie do mesmo guionista que leo con pracer, ainda que penso que a serie está perdendo folgos e non se desenvolve tan ben coma nun comezo. Igual tamén é que o debuxo de Tony Harris cansa un chisco e o de Pia Guerra non.

Romanticismo, aventuras, violencia, intriga, piratas, extinción masiva, lesbianas, bos, malos, xémeas, astronautas, espías, soldados, científicos mais e menos tolos, amazonas e merda de mono, alguén podería pedir mais?

O xoves é o día do libro, pode ser unha boa ocasión para agasallar(te) algo de BD E se queredes outro consello, xa rematou a edición a cor por Astiberri de Bone, un agasallo perfecto para nenos ou maiores. Ainda que mellor repito o de sempre, ide por unha libraría especializada, se non é unha grande superficie mellor e pedide que vos aconsellen segundo as vosas preferencias persoais.

Ben, ao final nin reflexións nin farrapo de gaita. As miñas boas intencións de publicar cousas no blogue quedaron polo camiño.

No tempo que non escribo as miñas rapazas curáronse e eu tiven unha farinxite benigna (mais prolongada) que estivo amolándome case quince días (ainda que sen febre).

Tamén decidín finalmente mercar o televisor detrás do que andaba detrás desde hai uns meses o Samsung LE40A656A. Se agardaba mais igual seguía baixando o prezo, porén igual o descatalogaban, e ademais cansei de agardar que xa lle tiña ben gañas. E co televisor merquei o reproductor HD. Tras moito darlle voltas optei por gastar case o menos posibel pensando en que a tecnoloxía avanza moito e en calquera momento vou querer mercar algo mais moderno: merquei o WD TV HD un reproductor sen disco duro interno con dúas entradas USB para conectarlle discos externos ou memorias. É curioso coma despois de romperlle a cabeza a Opaco durante meses pedíndolle a súa opinión e valorando opcións moito mais caras decidínme en poucos días despois de saber que o mercara outro amigo. Completei as compras mercando un disco externo Toshiba alimentado vía USB de 500Gb (para non ter que andar enchufando e desenchufando o que xa tiña da corrente que era moi coñazo). Despois de pensar que igual gastaba 1500€ ou 1800€ en montar o media center acabei gastando pouco mais de 1100€ incluindo o soporte para ter a tele pendurada da parede e os cables.

Este foi un dos motivos de que durante estes días achegárame só á rede pouco mais que para coidar da miña ra favorita.

Este afastamento fixo que nin me enterara de novas importantes de amizades da rede nin lera as opinións habituais para min sobre o que pasa no mundo, é o que ten abandoar o lector RSS.

Mesmo estiven sen entrar no administrador do blogue durante semanas, nin me enterei de que cambiaran a versión de wordpress da Blogaliza até que sentín os problemas que tiñan outros usuarios no grupo de correo da Blogaliza. O correo deixeino algo a monte, mais seguín abrindo os correos mínimos imprescindibeis para que a xente non pensara que morrera.

E hoxe despois dunha conversa con alguén moi vencellado á Blogaliza entro e vexo o bonito que esta a quedar todo, co novo logo da vaquiña, dándonos as costas xa feito público

gustoume moito desde a primeira vez que o vin, moi minimalista e preparada para poñerse escatolóxica co primeiro que pida gherra.

Despois da conversa que mantiven esta mañá e outras mais con xente que abandonou temporalmente ou mesmo pechou o seu blogue viña disposto a facer unha longa explicación que me levaba a facer un cese temporal en la convivencia D.U.P. e chego e atopo a Blogaliza tan bonitiña que sinto mágoa.

É certo que agora que a moruncha xa gatea (iso si que é unha novedade na vida e non a tele) precisa (e merece) moita mais atención da miña parte. Tamén o choio quítame moitas gañas de escribir sobre nada relevante ao chegar a casa. E entre unhas cousas e outras case non vou a ningures fora da casa, polo que tampouco podo botar man de crónicas culturetas para encher anotacións. Con todo tentarei achegarme ainda que sexa para dar sinais de vida, porque se fago unha pausa igual é para sempre.

Resumindo: teño pouco tempo e gaña de escribir, e cando podería escribir e teño ideas medio interesantes para poñer algo, normalmente estou indo no coche cara ó traballo así que é posible que o ritmo siga sendo igual de baixo durante unha tempada que poderían ser meses ou para sempre.

Aconsello a todos aqueles que (por escuros motivos) pasan por aquí para ver se escribín algo novo que empreguen un agregador de fontes RSS e así evitan tanto paseo.

Se vexo que teño forzas xa falarei un día destes da miña recente experiencia na casa coa HD e tamén debería falar das miñas lecturas de BD que hai moito que non as comparto.

Vémonos por aí.