Cada quen emprega as ferramentas que lle dan como pode ou como lle parece, e ás veces críase cunha idea e rematan servindo para outra.
Hai tempo en Chuza, a rede social de novas en galego editadas pola comunidade, falouse de filtrar a información por filias e fobias bloqueando aos usuarios que te amolan e favorecendo aqueles que te interesan mais. Daquela non me parecera boa idea, mais co tempo rematei facendo iso exactamente noutro lado: no Facebook.
Agora mesmo di o Facebook que teño 324 amigos. Mais non é certo que esas 324 persoas sexan amigos meus. En realidade nin sequera son 324 persoas, algúns deles son colectivos, negocios, medios, etc.
Teño curiosidade polo que din esas 324, algunhas mais que outras, e gústame poder comunicarme con eles ainda que nin sequera as coñezo a todas. Algúns son vellos coñecidos ou amigos de fora da rede, outros son coñecidos da rede que xa considero amigos ou amiguetes, xente que sigo e aprezo. Mais tamén hai xente á que admiro ou que se move no mesmo entorno ca min, cos que teño amigos comúns, ou mesmo xente que me engadíu e non vin no momento por que non engadilos.
Tento tratalos da mesma maneira que faría fora da rede, ainda que que colla algo mais de confianza cos descoñecidos que se os atopara na rúa, sei que os mais deles non son amigos meus e tento non abusar. Coa maioría non me importaría ter unha amizade, mais sei que arestora non a teño. Non son os meus amigos, por moito que amplíe o significado da verba amigo. Son contactos, ou coñecidos ainda que xa digo que no meu caso moitos nen iso. Porque eu non coñezo a Núñez Feijoo, Pérez Touriño ou Anxo Quintana ainda que o Facebook diga que somos amigos.
Por iso, non convidaría a Alan Moore, Balneario de Mondariz ou Bansky ao grupo eu son fan de Belén Regueira, ainda que si os convidaría se foran de verdade os meus amigos. Procuro non amolar á xente que non coñezo con cousas que penso que non lle interesan.
Acho que na netiqueta está por desenvolver a natureza destas amizades que non son tal. Gustaríame coñecer a vosa opinión sobre este tema se a tedes. E vós empregades facebook só para os amigos ou facedes coma min?
Eu procuro limitar o número de amizades en Facebook a xente que coñezo dalgún xeito (e non aos amigos dos amigos dos amigos), aínda que sexa só polo feito de poder utilizar a plataforma para intercambiar comentarios nun momento dado, pero hai que recoñecer que a cousa comeza a desmadrarse, polo que non sorprende que dende Facebook cambiasen as normas de uso para que reine o sentido común. Agora instan a que os perfís sexan para as persoas, os grupos para comunidades de usuarios e as páxinas para organizacións, empresas e campañas. Vaia, que deberiamos deixar de ter amigos que non sexan persoas, e iso xa é un avance.
Said by Marcus Fernández 24 Setembro, 2009 at about 10:49 p.m.
No meu caso a situaçom é case contrária. Tenho poucos amigos no facebook, como cincuenta, dos que conheço persoalmente a sete ou oito. A maioria dos restantes som conhecidos chuzeiros e há uns quantos que os aceptei ainda sem conhece-los porque me parecia que tinhamos intereses comúns.
E o facto de nom conhecer persoalmente á maioria deles é o que me bota atrás á hora de enviar invitaçons a grupos e cousas desas. Ás vezes até me boto atrás á hora de fazer algum comentário. E por vezes sim se faz molesto que che enviem muito spam, ainda que me chega muito mais á caixa de correio que por invitaçons.
Said by Chimpín 24 Setembro, 2009 at about 11:41 p.m.
Eu, despois de diversas clasificacións, agrupei os amigos e amigas en tres categorías: «moi perto», «perto» e «lonxe». Creo que é moi útil.
Said by xabre 25 Setembro, 2009 at about 3:03 p.m.
Coincido com o Xabre, há que fazer níveis de «amigos» e estou certo que o Facebook caminhará cara isso. Não quero ter no meu painel TODA a actividade dos amigos, não quero que todos poidam aceder a todo.
Mas bom, polo momento eu ainda não sou um utilizador intensivo de Facebook, pelo que basicamente não tenho problemas desse tipo.
Said by osak 25 Setembro, 2009 at about 8:53 p.m.
Ola ghanito. Eu dicía e a ver se agora a máquina deixa publicalo que en Facebook só teño amig@s ou xente que é colega. Nada de descoñecid@s ou amigas das amigas. De feito nin sequera teño foto miña no perfil. Gústame preservar a miña intimidade en certa maneira e tampouco quero ter centos de comentarios bicos postizos, sorrisos falsos, agasallos virtuais…
Said by marlempicka 26 Setembro, 2009 at about 11:53 a.m.
Agora si que saíu
Grazas a todos polos comentarios e autenticas apertas virtuais para todos
Said by ghanito 26 Setembro, 2009 at about 11:57 a.m.
Non estou en ningún grupo de ningunha rede social, mais é unha ferramenta de traballo bastante útil…según para quén. Xa me entendes.
Un saúdo.
Said by AnxoD 27 Setembro, 2009 at about 4:59 a.m.
Se che serve de consolo, a min non me amolas coas túas historias e gústame terte no facebook, pero pasarache coma a min, que terás máis contacto con outra xente de máis confianza. A min pásame coma seguro que a moitos, que intentei ter só ós coñecidos, pero fóiseme das mans e agora teño xente que coñezo por amigos ou outro tipo de organizacións que me gustan. É inevitable supoño, iso si, non lle dei a aceptar a amistade de ningún político, nin ningún indesexable (non lle estou chamando indesexable ó político, aínda que a según) pero xa me entendes. A min gústame o facebook polas cousas interesantes que enlaza a xente e que seguramente doutro xeito non me enteraría. É coma todo, hai que saber controlalo.
Said by kate 27 Setembro, 2009 at about 6:55 p.m.
Eu «apaguei» o Feisbuk precisamente por esa maneira de inzar coma os coellos. Eu, que non lle dou negado amizade a quen ma pida (outra cousa sería falar de cartos), acabei tendo tres ducias de «amigos» en menos dun mes. E, claro, así non hai quen se entenda. Ou son ou non son. Así que acabei por mandarlles unha mensaxe de despedida aos cinco ou seis máis de perto e…clic.
Non acabo de collerlles o punto eu a esas R.S.; pero hai que ter en conta que eu son máis de aldea real que virtual e vai ser por iso.
Said by Chousa da Alcandra 28 Setembro, 2009 at about 2:58 p.m.
Querido amigo na virtualidade.
Subscribo unha por unha todas as verbas desta anotación.
Said by Miriño 30 Setembro, 2009 at about 8:00 a.m.
Estou dacordo con Kate 27 e con Miriño tamén, aínda que te coñecera antes en persoa que polo FB.
Said by descalza 27 Outubro, 2009 at about 9:59 p.m.
Hei, non vale non é Kate 27. colouseme. buff
Said by descalza 27 Outubro, 2009 at about 10:00 p.m.